Pas dy barazimeve radhazi, Real Madridi i është kthyer fitores duke mposhtur Real Sociedadin me rezultat 5-1 në Santiago Bernabeu.
Nuk zgjati shumë nga fillimi i ndeshjes (6’) dhe Gonzalo Higuain i kaloi vendasit ne epërsi pasi pranoi një top nga Karim Benzema.
Pas një pasimi të bukur të Kaka, Cristiano Ronaldo shënoi golin e 100-të në La Liga (32’) pas 92 ndeshjesh duke u bërë lojtari i Realit që më shpejtë ka arritur këtë shifër dhe duke thyer kështu rekordin e Ferenc Puskas (i cili e ka arritur shifrën prej 100 golash në La Liga pas 115 paraqitjesh).
Karim Benzema realizoi një gol të bukur për ta trefishuar epërsinë e Los Blancos (40’), ndërsa Xabi Prieto shënoi golin që rezultoi i nderit për mysafirët (41’).
Në minutat e para të gjysmës së dytë (49’), Benzema shënoi edhe golin e dytë personal në këtë ndeshje.
Të njëjtën gjë e bëri edhe Cristiano Ronaldo disa minuta më vonë (56’), ndërsa asisti ishte i Gonzalo Higuan. Me këtë gol, portugezi u barazua në listën e golashënuesve me Lionel Messin, me nga 35 gola të shënuar në La Liga këtë edicion.
Pas kësaj fitoreje, Real Madridi ruan diferencën prej gjashtë pikësh nga Barcelona.
