Goli i parë në ndeshje erdhi në fund të pjesës së parë (43’), kur Didier Drogba pranoi një top të gjatë të Terryt dhe i kaloi Blutë në epërsi.
Në minutat e para të gjysmës së dytë (49’), arbitri Martin Atkinson pranoi një gol kontrovers të Juan Matas duke bërë që avantazhi të dyfishohej.
Gareth Bale e ngushtoi epërsinë (56’) duke u dhënë Spursave shpresa për rikthim në lojë, mirëpo në fund ky ishte vetëm një gol i nderit.
Pas një kombinimi me Lampard, Mata dërgoi një top drejt Ramires dhe braziliani i dha fund dyshimit për fituesin (77’).
Me një gjuajtje të lirë të mrekullueshme, Frank Lampard shënoi golin e katërt për Blutë (81’), ndërsa Florent Malouda vendosi rezultatin përfundimtar të takimit (90’+3).
Në finale të FA Cup, Chelsea do të përballet me Liverpoolin që në gjysmëfinale eliminoi Evertonin.
